Curso 2017-2018

SESIÓN DO LUNS 14 DE MAIO DE 2018

Finalizamos con VAN GOGH, nunha estraña sesión de escasa asistencia e pouca lectura. A sobrecarga e a competencia entre actividades minguou a afluencia. O libro proposto era O PINTOR DO SOMBREIRO DE MALVAS, do escritor Marcos Calveiro.

Tras uns breves comentarios de (re)presentación do libro, dalgúns detalles da vida do pintor e das circunstancias da súa morte (o que se intúe no libro e a teoría recente dos escritores Steven Naifeh e Gregory White Smith en VAN GOGH: LA VIDA. Ver: https://elpais.com/diario/2011/10/18/cultura/1318888804_850215.html ), puxémonos coa película de Robert Altman VAN GOGH, LA PELÍCULA:

Curso 2017-2018

                             Excursión do día 3 de maio de 2018 

O día 3 de maio os membros dos dous Clubs de lectura fixemos unha excursión á cidade de Pontevedra, xa que Mª Victoria Moreno, figura a que se lle dedica este ano o Día das Letras Galegas, pasou a maior parte da súa vida nesta cidade. 

 Comezamos a excursión cun paseo polo casco vello da cidade, cunha parada na Igrexa de Santa María onde puidemos subir ao campanario e ter unha vista de paxaro da cidade. 

Continuamos o paseo pola zona vella vendo as estatuas de Valle Inclán e a o grupo escultórico do artista César Lombera da Plaza San José, que recrea una tertulia de intelectuais galegos do século XX. Esta obra de arte rememora as tradicionais tertulias políticas, literarias e culturais que ao longo do século XX se realizaban no Café Moderno. As esculturas, realizadas en bronce a tamaño natural, mostran ao músico Manuel Quiroga que interpreta una pieza co seu violín, de pé e ante un grupo composto por Carlos Casares, tamén de pé, e sentados están Castelao, Ramón Cabanillas, Valentín Paz Andrade e Alexandre Bóveda. O grupo escultórico inclúe dúas cadeiras valeiras, que poden utilizarse como un elemento integrador co público a modo de invitación a sentarse. 

A seguinte parada foi no Museo de Pontevedra, onde puidemos admirar pinturas, esculturas, debuxos, gravados, obxectos arqueolóxicos, moedas, instrumentos musicais, útiles da vida cotiá, mobles, xoias, etc. Obxectos que permiten coñecer, a través do seu estudo, a evolución da sociedade galega desde os seus inicios máis remotos ata a actualidade. 

Finalmente, cando salíamos do Museo para volver ao autobús, atopamos ao Youtuber Gollegz, que se fixo unhas fotos cos seus fans. 

 Foi unha excursión moi ben aproveitada.¡Mágoa que rematase! . Esperamos a do próximo curso.

Curso 2017-2018

                                       Sesión do 16 de abril de 2018

   Finalmente puidemos facer a 6ª sesión do Club de lectura de 1º e 2º da ESO, tras excursións, avaliacións e vacación de Semana Santa. Tocaba traer lido o libro da saga Wonder, Charlotte tiene la palabra.

    Comentamos o argumento do libro, os problemas que atinxen máis ás rapazas e como poder resolvelos máis adecuadamente. Tamén falamos da amizade, dos vínculos que se crean entre as distintas persoas e de que a amabilidade sempre debe ser a norma a seguir.

    Vimos algúns vídeos de internet sobre a película e os actores e tamén un vídeo sobre rapaces e rapazas con malformación craneofacial, como lle acontece a August.

    Ao final da reunión iamos pasar a propoñer o seguinte libro programado, pero por unanimidade pediron ler o libro da saga que nos queda: La historia de Julian. 

A lectura deste libro nos permitirá entender o que pensa o matón e porque se comporta así con August. 

Finalmente para rematar vimos os vídeos: “Di no al acoso escolar” 

https://www.google.com/url?sa=t&rct=j&q=&esrc=s&source=video&cd=2&cad=rja&uact=8&ved=0ahUKEwjRr-n8ha3bAhVlJcAKHY27C5EQtwIILTAB&url=https%3A%2F%2Fwww.youtube.com%2Fwatch%3Fv%3D1GV8K6CscBU&usg=AOvVaw2zZ1rRa8KzS1ZllHLjYEqR

https://www.google.com/url?sa=t&rct=j&q=&esrc=s&source=video&cd=1&cad=rja&uact=8&ved=0ahUKEwioity9hq3bAhVQdcAKHQuiCigQtwIIJzAA&url=https%3A%2F%2Fwww.youtube.com%2Fwatch%3Fv%3Devz30_eK8YI&usg=AOvVaw2GhB2LO4RujMQGMiB7mAeR

E tamén a canción de El Langui “Se buscan valientes”.

https://www.google.com/url?sa=t&rct=j&q=&esrc=s&source=video&cd=9&cad=rja&uact=8&ved=0ahUKEwiul-j4hq3bAhVlJcAKHY27C5EQtwIIPzAI&url=http%3A%2F%2Fwww.dailymotion.com%2Fvideo%2Fx5rx1gu&usg=AOvVaw1-zTtyKbL8rreTVfoQLXhK

Curso 2017-2018

SESIÓN DO LUNS 9 DE ABRIL DE 2018

       Nova xuntanza co grupo de 3º e 4º ESO. 
       Continuando coas lecturas relacionadas coa arte, hoxe achegámonos a Goya. A sesión centrouse, nunha primeira parte, na lectura e comentario (variado: dende o vocabulario ata as aclaracións históricas necesarias para a comprensión) do primeiro capítulo do libro EL VUELO DE LA RAZÓN, de Vicente Muñoz Puelles, centrado no cadro A FAMILIA DE CARLOS IV: De Museo Nacional del Prado: 

  

Chamou a atención o traballo de composición e organización do cadro, así como o carácter  rabudo do príncipe Fernando, o futuro Fernando VII, na procura da súa preeminencia:

Na segunda parte da sesión proxectamos o documental de José Luis López-Linares titulado GOYA EN TIEMPOS DE GUERRA.

Curso 2017-2018

                                    Sesión do 26 de febreiro de 2018

     5ª sesión co grupo de 1º e 2º da ESO. Hoxe tiñan que traer lido o libro El Juego de Christopher.

Comezamos falando da historia e comparándoa coa película Wonder , comentando que este personaxe non aparece na película pero resulta ser moi importante xa que foi o primeiro amigo de August (o protagonista da saga).

    Limos en alto e comentamos algúns dos episodios que nos pareceron máis interesantes. Despois reflexionamos sobre a evolución de Christopher, que pasa de ser un rapaz moi déspota, que trata mal á súa nai  e que non presta a debida atención á súa amizade con August, a converterse nun rapaz moito máis responsable e que se decata da boa sorte que ten na súa vida, coa súa familia,  as súas amizades e a súa vida en xeral.

    Rematamos esta sesión lendo o seguinte libro da saga Wonder,  Charlotte tiene la palabra, que nos axudará a entender os conflitos, os problemas e as “estrañas” amizades que xorden ao comezo da Secundaria.

Curso 2017-2018

CLUB DE LECTURA

3º/4º ESO

SESIÓN DO 19 DE FEBREIRO DE 2018

Tocaba traer lido o libro CINCO CONTOS SOBRE VELÁZQUEZ, ou case. Balance desigual. Lembramos –reconstruímos- o argumento de cada conto e pasamos os cadros e algunhas historias mitolóxicas inspiradoras (caso de Aracné, por exemplo).

Falamos das sibilas:

“Como consecuencia do encontro con Ignacio Sobradiel, Mercedes tivo todo o día o tema das sibilas vivo no pensamento.

Ao iniciarse nos estudos da cultura clásica xa lle chamara especialmente a atención. Foi lembrando aspectos daquelas personaxes, sempre mulleres, que no mundo antigo eran oráculos que tiñan o don de predicir o futuro, en especial feitos de tipo espiritual, relixioso ou político que, de se cumpriren, haberían de orixinar importantes consecuencias na vida das xentes e das nacións.

Segundo constaba en numerosos textos da Antigüidade clásica, e en moitos outros posteriores, elas desenvolvían a súa portentosa actividade á marxe de sacerdotes, templos e palacios, e buscaban a densidade dos bosques, a penumbra silenciosa das cavernas e a influencia inspiradora dos torrentes que baixaban das montañas ou dos ríos que fluían polos bosques e polas chairas fértiles.

Manifestaban as súas profecías en estado de transo ou éxtase, e as primeiras que existiron facíano en hexámetros gregos, que se pasaban á escritura para que permanecesen.”

(Os soños da sibila, Joan Manuel Gisbert, páxinas 45-46).

Tratamos de entender mellor o conto de INOCENCIO X (Daniel Nesquens). Por algunha razón –tal vez os nomes dos pintores que aparecen mencionados, a viaxe a Italia, a foto no xardín e os preparativos para o cadro ou unha lectura apresurada- a algunhas alumnas lle resultou difícil.

     

Para rematar proxectamos algúns fragmentos do vídeo de Televisión Española sobre o pintor (DIEGO VELÁZQUEZ O EL REALISMO SALVAJE) e, en especial, as interpretacións doutros pintores ( de Goya a Bacon), fotógrafos e cineastas.